Drejtuesit e Tiranës vazhdojnë të numërojnë trofetë e fituara ndër vite, por prej kohësh e kanë shumë të vështirë të ndërtojnë një skuadër për të qenë. Blerja më e mirë e huaj në prag të sezonit të kaluar ndoshta ishte japonezi Masado Fukui, i cili prej kohësh qëndronte në Malin e Zi. Flitet për një futbollist luftarak, por me aftësi të kufizuara teknike. Gjithsesi, Fukui u bë i dashur edhe jashtë kufinjve të kryeqytetit, ndoshta edhe nga ngjyra e flokëve që e ndërronte çdo javë dhe në edicionin që pritet të nisë do të jetë pjesë e kampionëve të Skënderbeut. Ndërsa bardheblutë mund të mos kenë më para, por si eksplorator mbeten njëlloj të talentuar.
Për hir të Ilir Dajës kanë gjetur edhe dy japonezë të tjerë edhe ata në Malin e Zi. I pari dhe që duket edhe si më i fisëm është Rjota Noma, një mesfushor, por që thuhet se mund të luajë edhe si sulmues krahu, të cilin e kemi parë, pasi u aktivizua në të dy ndeshjet e Europa League, ku si pjesë e Rudarit luajti kundër Kukësit. Ndërsa tjetrin e kanë gjetur “më afër” Tokios, quhet Hiroaki Jamamoto dhe ka luajtur për Igalos, në kategorinë e dytë të vendit fqinj. Trajneri Daja i ka provuar që në miqësore të zhvilluar dje në Serbi, por ende nuk ka një vendim zyrtar nëse do të qëndrojnë tek Tirana, madje gojët e liga kanë bërë me dije se nuk kanë treguar asgjë duke i krahasuar qoftë edhe me Fukuin, edhe nga fantazia për të zgjedhur ngjyrën e flokëve.
