Gjatë një takimi të përbashkët të hënën në Prishtinë mes qeverive të Kosovës dhe Shqipërisë, kryeministri Edi Rama tha se do të paraqesë personalisht një raport në Këshillin e Evropës në Strasburg që po përgatitet në parlamentin e Shqipërisë për të vënë në pikëpyetje raportin e Dick Marty dhe atë që ai pretendoi se ishte ndikimin rus mbi këtë.
Raporti i raportuesit zviceran për Këshillin e Evropës në vitin 2010 akuzoi liderët e luftës për pavarësinë e Kosovës për krime lufte dhe trafik organesh dhe luajti një rol të drejtpërdrejtë në arrestimin e mëvonshëm të ish-presidentit të Kosovës, Hashim Thaçi, dhe të tjerëve.
“Do të shkoj personalisht në Strasburg, në rastin më të parë, shpresoj në shtator për t’iu drejtuar Këshillit të Europës për një fakt që bëhet gjithnjë e më shqetësues. Është pabazueshmëria totale e raportit të Dick Martit dhe influenca ruse mbi këtë përrallë të një Shtëpie të Verdhë e trafikut të organeve”, u tha Rama gazetarëve.
Rama e vizitoi ish-presidentin Thaçi në maj në burgun e Hagës, ku ai pret gjykimin për akuzat për krime lufte të përfshira në raport, dhe bëri një vizitë te familja e Thaçit në fshatin e tij të lindjes, Buroje të komunës së Skenderajt.
Më 9 qershor, Dhomat e Specializuara të Kosovës ia zgjatën paraburgimin ish-presidentit të Kosovës dhe ish-kryeparlamentarit Kadri Veseli, duke përmendur shqetësimet se ata mund të arratiseshin ose të ndërhynin te dëshmitarët.
Thaçi ishte drejtor politik i Ushtrisë Çlirimtare të Kosovës, UÇK, dhe u bë president i Kosovës në periudhën e pasluftës.
Veseli ishte shef i shërbimit informativ të UÇK-së dhe më vonë u bë kryetar i Kuvendit. Ai ishte kryetar i Partisë Demokratike të Kosovës në opozitë, PDK, në kohën e arrestimit.
Dy burrat presin gjykimin për akuzat për krime lufte së bashku me dy ish-bashkëluftëtarët e tyre, gjithashtu figura të rëndësishme politike në Kosovë – kreun e grupit parlamentar të partisë Vetëvendosje, Rexhep Selimi, dhe kryetarin e këshillit kombëtar të Partisë Nisma Socialdemokrate (NISMA), Jakup Krasniqi.
Thaçi, Veseli, Selimi dhe Krasniqi akuzohen se janë përgjegjës për krime të kryera në luftën e Kosovës për pavarësi kundër Serbisë në fund të viteve 1990 kundër qindra civilëve dhe joluftëtarëve.
Shumica e krimeve të supozuara janë kryer në qendrat e paraburgimit në 17 komuna në Kosovë dhe dy rrethe të Shqipërisë, Kukës dhe Has.
Dhomat e Specializuara të Kosovës u krijuan për të gjykuar krimet që dyshohet se janë kryer gjatë dhe menjëherë pas luftës së Kosovës nga viti 1998 deri në vitin 2000. Ato janë pjesë e sistemit gjyqësor të Kosovës, por të vendosura në Holandë dhe me personel ndërkombëtar.
Ato u krijuan nën presionin e aleatëve perëndimorë të Kosovës, të cilët druheshin se sistemi i drejtësisë së Kosovës nuk ishte mjaftueshëm i fuqishëm për të gjykuar rastet e UÇK-së dhe për të mbrojtur dëshmitarët nga ndërhyrja. Kjo gjykatë nuk shihet me sy të mirë në Kosovë.
Shumë shqiptarë të Kosovës e shohin gjykatën si një fyerje për luftën e UÇK-së për çlirim nga sundimi serb./ Reporter.al/
