Kontrata që firmosi në verë me Partizanin bën që Edgar Çani të mos shqetësohet shumë sa i përket të ardhmes. Me sa duket sulmuesi i ka kopsitur gjërat që në fillim, pasi klubi e ka të vështirë që ta zgjidhë marrëveshjen me sulmuesin, i cili erdhi me bujë të madhe, por ka rezultuar një dështim deri tani.
Pas ndeshjes me Luftëtarin, 28-vjeçari shkoi në Itali për t’i kërkuar llogari klinikës që i operoi gjurin në maj, pasi rikuperimi i tij ka zgjatur jashtë çdo limiti. Çani është kthyer nga Italia, ku kreu ekzaminimet e radhës së gjurit problematik. Sulmuesi është vizituar te klinika ku është operuar në maj dhe, pas kontrollit, ka rezultuar se operacioni është kryer në rregull, por gjuri ka nevojë të pastrohet sërish, kështu që rikuperimi i tij do të zgjasë edhe për pak.
Klubi po e analizon me kujdes situatën e sulmuesit, por së fundmi po shikohet dritë në fund të tunelit në lidhje me të ardhmen e Çanit. Mësohet se mjekët italianë u kanë dhënë garanci drejtuesve të Partizanit se pas pastrimit të gjurit, për një muaj sulmuesi do të jetë totalisht gati. Sipas kësaj logjike të ofruar nga mjekët italianë, i bie që Edgar Çani të jetë gati në shkurt, por trajneri Starova nuk para i beson shumë këtij versioni, pasi pohoi se nuk i var shpresat te 28-vjeçari.
