Një pjesë e ndeshjeve të programuara për të shtunën në Kategorinë e Parë do të shtyhen për të mërkurën dhe kjo për shkak se në Gjirokastër futbollistët kanë qenë më shumë se spital se sa në fushë për t’u stërvitur. Fillimisht u tha për një helmim masiv të lojtarëve, por në fund u konfirmua se bëhej fjalë vetëm për një virozë. Klubi i Luftëtarit i ka kërkuar zyrtarisht FSHF-së shtyrjen e ndeshjes, që sipas kalendarit duhet të luhej nesër në orën 15:00 në transfertën e Cërrikut dhe fillimisht u vendos që ky takim të zhvillohej të dielën në të njëjtën orë. Më pas kanë qenë zyrtarët e Fierit dhe të Pogradecit që kanë protestuar, me logjikën se nuk është normale që gjirokastritët të kenë luksin të presin rezultatet e skuadrave të tyre, aq më shumë që në këtë fazë të nxehtë të kampionatit janë dy pikë përpara tyre në tabëlën e klasifikimit. Dhë përfundimisht është vendosur nga institucioni që drejton futbollin në vend, që ndeshjet e të gjithë grupit të jugut të zhvillohen të mërkurën, kohë e mjaftueshme për të bërë efekt paracetamoli i Gjirokastrës.
Sipas shefit të sektorit të garave në FSHF, Lusien Nurishmi, edhe klubet e tjera kanë rënë dakord me këtë vendim, gjë që nuk rakordon me deklaratat që vijnë prej drejtuesve të Apolonisë, Pogradecit, por edhe Turbinës së Cërrikut, një skuadër që është e interesuar të shfrytëzojë çdo mundësi për të fituar pikë mbijetese. “Ne nuk jemi mjekë, por gjendja atje ka qenë e rëndë dhe shtyrjen e ndeshjeve për në mesjavë e mendoj si një vendim human”, thotë Nurishmi, ndërsa kundërshtarëve vazhdon t’u interesojë temperatura e lartë e gjirokastritëve, të cilët kanë ditë që janë transferuar prej skuadiumit “Luftëtari” në spitalin “Omer Nishani”.
