Nga Majlinda Bregu
Nuk ia dilet me sharje e malkime nga një e sëmurë të një e pashpirt deri tek monstra e radhës si kjo që na ngjethi sot në STOP të TV Klan që i lëshonte duart njësoj si mbi gur mbi një fëmijë 3 vjeç.
Nuk ia dilet e as zgjidhim gjë se na prishet gjaku e imagjinojmë si do ta tërhiqnim zvarrë këdo që do godiste fëmijët tanë.
Ajo e qarë e atij fëmije duhet të ngjethë e të shkundë së pari Ministrinë e Arsimit për të gjetur mekanizmin e verifikimit me urgjencë të çerdheve, kopshteve e shkollave private të licensuara.
Inspektoriati Shtetëror i Arsimit duhet të bëjë MENJEHERE publike listën e çerdheve, kopshteve, CV e pronarëve, edukatoreve, kartelat e tyre personale, çertifikata mjeksore, vlerësim permanent nga grup mjekësh, psikiatër, psikologë.
Dokumentat për dhënien e heqjen e licensave sidomos kur bëhet fjalë për institucione arsimimi apo përkundesje si dhe vlerësimi periodik duhet të jenë PUBLIKE.
Nuk duhet vetëm analiza e gjakut dhe a kanë kaluar verdhëzën ata që ju besojmë fëmijët, POR mbi të gjitha vlerësimi i statusit të përgjithshëm mendor dhe emocional, vlerësimi psikiatrik i tyre!
Eshtë e kotë të flasësh për standarte performance pedagogjike, kur kërcet akoma mendja e sëmurë si mësim për qarjen e fëmijës!
