Lufta mes gjelave është një sport i paligjshëm, por shumë popullor, sidomos në Amerikën Latine dhe Azi. Diçka e pazakontë ka ndodhur së fundmi në Filipine.
Një oficer policie është vrarë nga një gjel gjatë një sulmi në një luftë të paligjshme në provincën e Samarit Verior. Togeri Christine Bolok u godit nga ‘thika’ e gjelit, një teh çeliku i mprehtë që është zakonisht i lidhur me këmbën e gjelit që përfshihet në dyluftim.
Tehu i preu kofshën e majtë, duke i prerë arterien kryesore. Ai u dërgua me urgjencë në spital dhe u shpall i vdekur pas mbërritjes. Shefi i policisë provinciale, koloneli Arnel Apud i tha agjencisë së lajmeve AFP se aksidenti ishte “për të ardhur keq”.
“Nuk munda ta besoj kur më raportuan. Kjo është hera e parë në 25 vitet e mia si polic që kam humbur një burrë për shkak të një lufte midis gjelave”.
Tre persona u arrestuan dhe shtatë gjela luftarakë, u konfiskuan, raportoi PNA.
