Familjarët e Myrteza Hysit nga Berati, i cili ndërroi jetë këtë pasdite në spitalin rajonal të Beratit kanë kërkuar kthimin e trupit të tij për t’i bërë ritet e fundit, por spitali nuk pranon.
Sipas spitalit, i ndjeri ishte i infektuar në koronavirus dhe prandaj nuk mund ta dorëzojnë trupin e tij për shkak se bëhet shkak për përhapjen e COVID-19.
Por sipas familjarëve të të ndjerit, Myrteza Hysi vuante nga shumë sëmundje dhe kishte probleme me zemrën, diabetin dhe veshkat teksa kishte qëndruar dy javë në spital.
Ai kishte dalë përpara disa ditëve, ndërsa këtë të hënë urgjenca e kishte marrë sërish në spital.
Ata nuk pranojnë se Myrteza Hysi ishte i infektuar pasi atij nuk i është bërë tamponi dhe se në spital kujdeseshin familjarët.
Plaku ka qenë i shtruar në spital. Vuante nga veshkat, diabeti, tension, qëndroi 2 javë në spital. E sollën në shtëpi. Sot erdhi urgjenca e kishte marrë sërish. Këtu po jepte shpirt. Thonë që ishte me koronavirus. T’i bëhej tamponi. Motra, nusja, vëllai rrinin në spital dhe kujdeseshin për të. Po të ishte ashtu siç thonin këta nuk e mbanin këtu në spital po e çonin në Tiranë si gjithë të tjerët. Sot nuk e di se çfarë i nxorën. Nuk ka qenë me koronavirus. Duam që të sjellin plakun në shtëpi. Unë kam nusen, vëllanë dhe atëherë do infektoheshin dhe ata” – shprehet vajza e tij për Report Tv.
