Një aksident tragjik është shënuar mbrëmjen e djeshme në dalje të tunelit të Elbasanit, ku 2 vajza kanë humbur jetën dhe 2 të tjera kanë mbetur të plagosura.
Sipas policisë makina tip Benz që Behar Pema drejtonte ka goditur makinën me të cilin udhëtonin katër vajza, duke lënë të vdekur dy prej tyre Lusida Garunja dhe Xheneta Qallia.
Ndërsa gjendja e dy të plagosurave Denisa Dibra dhe Nervida Garunja, është e stabilizuar dhe tashmë ato janë jashtë rrezikut për jetën.
Njoftimi i plotë
Në lidhje me informacionin e dhënë mbrëmjen e djeshme për aksidentin e ndodhur në aksin rrugor Tiranë-Elbasan, në dalje të tunelit të Krrabës, ku shtetasi B. P., 58 vjeç, banues në Tiranë, duke drejtuar mjetin tip “Benz” në gjendje të dehur, është përplasur me mjetin tip “Volksëagen”, me drejtuese shtetasen D. D., 26 vjeçe, banues në Shkodër dhe për pasojë kanë ndërruar jetë në spital dy pasagjeret, shtetaset L. G., 19 vjeçe dhe Xh. Q., 18 vjeçe, të dyja banuese në Shkodër, si dhe janë plagosur shtetaset D. D. dhe N. Q., 19 vjeçe, banuese në Shkodër, të cilat ndodhen jashtë rrezikut për jetën, bëjmë me dije se shërbimet e Policisë kanë kryer të gjitha veprimet hetimore.
Në përfundim të veprimeve hetimore, specialistët e Qarkullimit Rrugor në Drejtorinë Vendore të Policisë Elbasan arrestuan në flagrancë shtetasin:
B. P., 58 vjeç, banues në Tiranë, për veprat penale “Shkelja e rregullave të qarkullimit rrugor” dhe “Drejtimi i mjetit në mënyrë të parregullt”.
Materialet hetimore i kaluan Prokurorisë pranë Gjykatës së Shkallës së Parë Elbasan, për veprimet e mëtejshme procedurale.
