Ish-deputeti demokrat, Enkelejd Alibeaj, ka hedhur akuza të rënda kundrejt qeverisë ndërsa thekson se për zgjidhjen e krizës kryeministri Edi Rama kërkon të përdorë dy ide të rrezikshme.
Këto ide sipas Alibeajt janë dy lëvizje, legalizimi i kanabizit dhe amnistia fiskale e parasë së krimit. Duke folur për amnistinë fiskale, ish-deputeti deklaroi se Rama po mendon të bëjë amnisti të parave të krimit dhe të legalizojë kanabisin.
“Jam në parim kundër çdo amnistie fiskale, siç e ka konceptuar qeveria. Duket se më këtë lloj amnistie fiskale, Rama kërkon të thithë financa nga pjesa e nëndheshme e krimit të organizuar. Është një ide e rrezikshme që po vërtitet në mendjen e Ramës, që të gjejë zgjidhje me dy lëvizje, legalizimin e kanabizit dhe amnistia fiskale e parasë së krimit. Këto janë dy goditje nën brez, që do t’i jepen shtetit. Është shërbim i keq për ekonominë, jetën e shqiptarëve. Për këtë arsye, jemi totalisht kundër”, u shpreh Alibeaj.
