Komisioneri i BE: Të miratohet para verës, pastaj zbatimi
Edhe në ditën e dytë të qëndrimit në Shqipëri, komisioneri europian për zgjerimin Johanes Hahn, nuk ka reshtur së foluri për Reformën në Drejtësi. Në mbyllje të takimit dy ditor të Ministrave të Jashtëm të vendeve të Ballkanit Perëndimor në Durrës Hahn ka deklaruar se: “Bëmë një inventar të realizimit të 5 prioriteteve dhe drejtësia është në zemër të përparësive. Është element kyç dhe na duhet një vendim përpara pushimit të verës. Të respektohen mendimet e Komisionit të Venecias, të respektohet marrëveshja në parim që është arritur dhe të miratohet reforma në drejtësi. Miratimi është hapi i parë, ndërsa i dyti është zbatimi i saj. Duhet zbatimi i mirë që të mund të shohim në tetor rezultatet, që shpresojmë të jenë në drejtimin e duhur. Nëse është kështu, jam optimist”.
Ndërkohë është folur edhe për takimin dy ditor të Ministrave të Jashtëm të vendeve të Ballkanit Perëndimor, i cili përfundoi me miratimin e një drafti prej 5 pikash për projekte në infrastrukturorë, për çështjet për rininë, përballimin e krizave si ajo e refugjatëve dhe për luftën kundër terrorizmit. Komisioneri Hahn deklaroi se po punohet për një paketë 150 milion euro që do të prezantohet në Samitin e 4 korrikut në Paris për 10 projekte, 6 nga të cilat janë për transportin dhe 4 në fushën e energjetikës.
