Temperaturat e ulëta të ditëve të fundit kanë shënuar viktimën e parë në Durrës. Një i pastrehë është gjetur i pajetë ditën e sotme në lagjen nr. 17 të këtij qyteti.
Viktima, rreth 30 vjeç identiteti i të cili ende nuk bëhet me dije, njihej si endacak dhe person me probleme mendore. Nga hetimet paraprake dyshohet se vdekja ka ardhur si pasojë e temperaturave të ulëta.
Ndërkohë Avokati i Popullit, Igli Totozani, u shpreh se: “Kjo është një tragjedi njerëzore e paralajmëruar. Drejtuesit vendor nuk duhet të presin që të pastrehët apo të vobektit t’u zënë derën e zyrës, por të dalin vetë në terren së bashku me stafet e tyre, të identifikojnë qytetarët në nevojë dhe t’u ofrojnë atyre ndihmë dhe strehë. Të gjithë duhet të kontribuojmë në mbrojtje të së drejtës së jetës”.
