Nga Alda Dalushi
Dje, në mëngjes u njoha me listat për kandidatë të Partisë Demokratike e nuk mund ta fsheh faktin se, ajo për të cilën po buçet media – mospërfshirja në lista e disa emrave që kanë bërë historinë e PD-së, nuk më habiti. Janë zgjedhjet, zgjidhjet, marrëveshjet pragmatiste të një kryetari, i cili shpesh ngre kauza, për të mos iu dalë dot për zot fund e krye.
Vangjel Dule, kandidat i PD-së në Qarkun e Vlorës. E lexova dhe për një moment mendova që e kisha kuptuar gabim.
Po fundja, kur i hapi dyert Kastriot Islamit, përse të mos ia hapte edhe Dules, do mendonte shumëkush.
Vlora është një prej qarqeve që ka numrin më të madh të banorëve më rrënjë çame, një pjesë e konsiderueshme e të cilëve janë votues të së djathtës, të përfaqësuar nga PD. Të vendosësh Dulen në Vlorë si kandidat, është fyerje e pastër që ju bëhet jo vetëm këtyre njerëzve, por mbi të gjitha kujtimit të atyre që 50 e kusur vite më parë u dëbuan nga toka e tyre, u vranë e u masakruan. Çfarë iu thotë çamëve të Vlorës kryetari Basha, duke kandiduar Dulen në radhët e Partisë së tij, duke kandiduar një njeri që i del në mbrojtje haptazi deklaratave diskriminuese të një ministri grek, që shkel në tokën e shqipeve dhe ofendon rëndë një popull të tërë.
“Nuk ka pasur, në kohërat e demokracisë në shtetin grek asnjë krahinë me emrin Çamëri. Askush nuk mund t’i imponojë shtetit grek toponimet e veta”, deklaronte Dule në një emision politik para disa kohësh.
Unë jam çame dhe për këdo që më njeh, mbështetja që i kam dhënë PD-së në kohë të mira e të vështira, nuk është e panjohur. Sot pyes publikisht Lulzim Bashën: Cili është mesazhi që kërkon t’ju përcjellësh vlonjatëve dhe sidomos atyre me origjinë çame, me përfshirjen e Dules në listat e PD-së? Cila është filozofia që bashkon medemek të djathtën e përfaqësuar nga PD me imazhin e PBDNJ-së?
Në facebook-un tim hodha një status, ku përmendja edhe tim gjysh. I ndjeri, pasi vuajti gjithë fëmijërinë e tij – u dëbua nga shtëpia në Gardhiq, pa të atin të masakruar nga bandat greke – rriti fëmijët në diskriminimin e një Shqipërie të qelbur komuniste e më pas shpresoi se vërtetë e djathta përfaqësohej nga PD-ja e kjo do të sillte erën e ndryshimit. Moshatarët e tij ndoshta janë ende gjallë e më shumë mundësi kanë ende takat të votojnë.
Zoti Basha, nuk besoj se duart iu bëjnë të votojnë PD-në.
Kandidatura e Dules është thika në plagë, kushdo tjetër mund ta kishte bërë, por jo një parti që pretendon të jetë e djathtë.
