Struktura e Posaçme Anti Korrupsion ka shpallur në kërkim Ervis Kosovën, si personi i dytë i cili dyshohet se ka bashkëpunuar me Elton Goskovën (Gani Shehun), me qëllim manipulimin e dëshmitarit të Drejtësisë, Luftar Reçi.
Ora news shkruan se Ervis Kosova, prej disa muaj është larguar në drejtim të Kosovës, shtet në të cilin vijon të banojë. Ndërsa hetimi penal dhe mbajtja në mbikqyrje e Ervis Kosovës dhe Elton alias Gentian Goskovës, ka filluar qysh prej muajit qershor të vitit 2021.
Kosova është i riu i cili u kap nga policia në muajin nëntor të 2021 pasi po bënte gara me mjetin “Ford Mustang” e më pas videot i postonte në rrjete sociale. Ai u kap në atë kohë nga policia pasi kishte dërguar mjetin në një servis, vend në të cilin u zbulua.
SPAK ka administruar një sërë prova si përgjime dhe fotografim të takimeve, që dy personat e proceduar kanë kryer me individë të ndryshëm të familjes Reçi, me qëllim manipulimin e dëshmitarit të SPAK, Luftar Reçi, i cili ka treguar për dy ngjarje shumë të rënda, ku në muajin Shkurt 2005 në Tiranë u vranë Vajdin Lamaj, Artan Arsi dhe në Durrës u ekzekutua, Klodian Saliu.
Ndërkohë ditën e sotme, Gjykata e Posaçme, ka vendosur të lerë në fuqi masën e sigurisë “Arrest në Burg”, për Elton alias Gentian Goskovën, i arrestuar me urdhër të prokurorit, Altin Dumani. Vendimi për mbylljen në burg të Goskovës ose siç njihet ndryshe me nofkën “Reqi i Korçës”, është marrë paraditen e sotme nga gjyqtari, Erjon Bani.
