Deputeti i Partisë Demokratike Ervin Salianji në seancën e sotme plenare foli sërish për inceneratorin e Elbasanit dhe atë të Fierit, duke thënë se opozita dhe qytetarët shqiptarë kërkojnë që drejtësia të çojë deri në fund këtë aferë korruptive, siç e cilëson PD.
“Opozita dhe shqiptarët kërkojnë që drejtësia që ta çojë deri në fund këtë aferë korruptive. Vënia e gjoksit para nga kryeministri është për të intimiduar. Po plehrat e Durrësit pse sillen në Tiranë dhe nuk e ndërtojmë në Durrës. Këta kërkojnë ta mbysin me retorikë, duke thënë se është një situatë alarmante e ndotjes së mjedisit. Qeveria kërkon që të përfitojë para me këto inceneratorë dhe t’i dërgojë në Maltë përmes Mërtirit, apo emra të tjerë”, ka thënë Salianji.
Sipas tij SPAK duhet t’i shkojë deri në fund kësaj çështje, duke i dhënë fund njëherë e mirë korrupsionit dhe zhvatjes së parave të shqiptarëve.
“Më të turpëruarit në këtë situatë duhet të jenë ata dhe ky që bën sikur ka gjetur ndonjë zgjidhje të madhe, ne inkurajojmë SPAK që t’i shkojë deri në fund dhe të justifikojë besimin e partnerëve kombëtare, qoftë për të justifikuar taksat e shqiptarëve të cilët i kanë tek personat më të mirëpaguar sot në Shqipëri, për ti dhënë fund njëherë e mirë mosndëshkueshmërisë, korrupsionit dhe zhvatjes së parave të shqiptarëve për t’i kaluar në dy tre duar në këtë vend”, përfundon deputeti i Partisë Demokratike.
