Opozita dhe LSI kërkojnë tryezë të nivelit të lartë politik
Mbledhja e parë e Komisionit të Posacëm për Reformën në Drejtësi nuk ka dhënë asnjë rezultat konkret. Mungesa e konsensusit mes palëve politike vetëm s aka ravijëzuar një ”aleancë” të re mes demokratëve dhe LSI. Që të dy këto forca kanë kërkuar që reforma në drejtësi duhet të kalojë vetëm nëpërmjet një dialogu dhe konsensusi të gjerë politk. Për deputetin Eduart Halimi “PS nuk e do reformen në drejtësi prandaj e refuzon dialogun politik”. Në mbështetje të tij ka qenë edhe përfaqësuesi i Lëvizjes Socialiste për Integrim Spartak Braho, i cili ka kërkuar që krahas tryzës parlamentare të ketë edhe një tryezë të nivelit lartë politik, të përfaqësuar nga kryetarët e partive.
Në mbledhjen e parë të Komisionit, pas marrjes së rekomëndimeve përfundimtare nga “Venecia” demokratët janë paraqitur me 11 çështje për të cilat nuk bien dakord me draftin e mazhorancës. Ata vijojnë të këmbëngulin se shumica po punon për kapjen politike të sistemit të drejtësisë. Me 11 pikat e prezantuara nga demokratët rrëzohet pothuajse gjithë arkitektura e sistemit që parashikohet të ngrihet. Por rikthim në pikën 0 të procedurës që do ndiqet ka kërkuar dhe përfaqësuesi i LSI-së Spartak Braho. Ai kërkoi ngritjen e një sekretariati teknik që të rendisë të gjitha propozimet dhe shqetësimet e partive politike dhe listoi 5 çështje të cilat kërkojnë vëmendje në këtë reformë. Sipas tij ata janë roli i Gjykatës së Lartë, rolin e ministrit të Drejtësisë, vendosja e parimit te rekrutimit profesional në Gjyqësor e Prokurori, rishikim të rolit të Prokurorise, dhe formula e përberjes se organeve kushtetuese.
Por përballë kësaj, socialistët, janë të mendimit se kundërshtitë janë thellësisht teknike përveç formulës së zgjedhjes së anëtarëve të institucioneve kushtetuese. Kryetari Fatmir Xhafa, propozoi që puna të nisë me ekspertët, dhe poltika të ndërhyjë në fund për çështjet që nuk dakordësohen. Ndërsa deputeti Pandeli Majko ka thënë se me kërkesat e demokratëve nuk mund të ketë konsensus politik. Pas tre orë debatesh komisioni nuk arriti të përcaktojë metodologjinë që do të ndiqet më tej për reformën në drejtësi.
