Nga Mehmet Elezi
1.
Maturantët janë lazdranë, rini e llastuar. Si s’paska të bëjë me letërsinë varka e Turit?
Varka e Turit është varka e Noes. Turi ka qenë ndihmëstimonier.
Për të shkruan “Epi i Gilgameshit” dhe Homeri te “Iliada”.
Edhe Danteja te “Komedia Hyjnore”, saktësisht te “Parajsa” (Danteja e dinte se Turi shkoi në parajsë).
Sipas studimeve të fundit, mëdyshja hamletiane “to be or not to be” është mëdyshja e Turit, kur vëren shkëmbin. Ajo frymëzoi Shekspirin.
Edhe libri pesëmijëvjeçar “Mësimet e Ptahhotepit”, më i lashti i botës, shkruan për Turin. Aty kumti i Turit është i koduar. Më hollësisht www.turi.bota.al
2.
Ministri i shëndetësisë i Kilit dha dorëheqjen. Koronavirusi.
Në Shqipëri numri i të prekurve rritet çdo ditë, me kërcim.
Dje qe 57. Sikur të mos ishim të fundit në Europë për testimet, sa do të ishin? Mjaft të sëmurë kanë shkuar për lesh e kanë dalë të qethur. E kanë marrë të ligën në spitale. 61 pozitivë nga personeli mjekësor.
Mungojnë mjetet? Kushtet? Kontrolli?
Sa për viktimat, disa duan t’i rritin artificialisht. Shtojnë ata që kanë pasur kush zemër, kush mushkëri e kush veshka.
Dorëheqje në mes të lumit?
Ku është parë!
Fillimisht duhet të nxjerrim dy varkat në breg.
Varkën e Turit dhe varkën e Virusit.
