“Gruaja nuk është numër, ne jemi elementi thelbësor i politikës, parandaj na mbështesni”
Deputetja e Partisë Drejtësi Integrim dhe Unitet, Mesila Doda në fjalën e mbajtuar para banorëve dhe simpatizantëve të kësaj force në Rrogozhinë vlerësoi leksionin e marrë nga kryebashkiaku i këtij qyteti, që është pikërisht përparësia që puna ka mbi fjalët.
“Bushi na mësoi të gjithëve që fushata nuk mund të behej me batuta e sharje por duke u treguar njerëzve çfarë kemi bërë”, tha Doda.
Deputetja tha ndër të tjera se evidentimi i mungesës së grave në listat e partive bëhet thjesht për fushatë, por sipas saj kjo është e gabuar sepse nuk bëhet fjalë vetëm për çështje numrash.
“Gruaja nuk është numër, ne jemi elementi thelbësor i politikës, parandaj na mbështesni”, nënvizoi Doda.
Duke vijuar mbështetjen e saj mbi forcimin e bazave të shëndosha familjare, Doda u shpreh se projektligji i parë i PDIU në Parlament do të jetë në dobi të shtimit të familjeve. Ajo tha se shpenzimet për më shumë se dy fëmijë do duhet t’i mbulojë shteti.
“Mesa duket Bushi është i destinuar të na sjellë ndryshimin të gjithëve sepse na mësoi të gjithëve që fushata nuk mund të bëhej me batuta e sharje por duke u treguar njerëzve çfarë kemi bërë. Faleminderit super Bushi! U falenderojmë të gjithëve që keni ardhur sot duke sjellë një frymë të re. Kemi parë të gjithë partitë e madha që vuajnë sot arrogancën e disa viteve.
E di që është e vështirë të thuhet familje, grua apo fëmijë në fushatë. Partitë akuzojnë njëra-tjetërn, kur thonë kjo apo ajo parti mori gjobë se nuk respektoi kuotat e grave në lista. Dua t’u them se gruaja nuk është numër, ne jemi elementi thelbësor i politikës, prandaj na mbështesni.
Ju i dini të gjitha betejat që PDIU ka zhvilluar në mbrojtje të familjes, në Parlament donin të ndryshonin skemën tradicionale të martesës, jo më burrë-grua, po burra burra dhe ne nuk ramë dakort, sepse ne duam Zotin dhe familjen. Zoti është besim, ndaj gëzuar Ramazanin, Zoti ua pranoftë lutjet.
Sot familja shqiptare është më e sulmuar se kurrë pikërisht për këtë, që në fillim do sjellim në Parlament projektligjin e familjeve që kanë dy fëmijë ose më shumë. Në mbështetje të familjes do duhet që të gjitha shpenzimet për fëmijën e dytë, të tretë apo të katërt e me radhë t’i mbulojë shteti shqiptar.
Ky do jetë një nga projektligjet që PDIU sjell në Parlament.
Kur erdha këtu dikush më tha që nëse ju keni ardhur me rezultat shumë të mirë ne do jemi vula përfundimatre, por di të them se sido që të shkojnë punët ne do jemi mbështetësit tuaj në Parlament”, tha Doda.
