Mesila Doda ka reaguar lidhur me drogën në vend, ku siç shprehet ajo, antimafia italiana jep sinjalin e fortë kundër krimit dhe drogës shqiptare.
Me anë të një postimi në facebook, Doda tha se në Shqipëri duket jetojmë në një planet tjetër, ku secili bën sikur nuk sheh e nuk dëgjon.
Postimi i plotë
Duke thyer Omertà-n alla shqiptare
Antimafia italiana jep sinjalin e fortë kundër krimit dhe drogës shqiptare. 192 trupa speciale, përfshirë policinë gjyqësore, financiare e kështu me radhë.. do instalohen në Foggia dhe do hetojnë trafiqet me Shqipërinë.
Në Shqipëri duket se jetojmë në një planet tjetër, ku secili bën sikur nuk sheh e nuk dëgjon, sepse kodi i heshtjes, e famshmja Omertà e mafias, është me sa duket mundësia e vetme e jetesës dhe mbijetesës.
Unë nuk di asnjë vend që të jetë zhvilluar e begatuar duke lejuar trafiqe e krim, por me sa duket ne e paskemi lehtësisht të pranueshme bashkëjetesën me të keqen. Nëse mendojmë që nga krimi dhe droga do na shpëtojnë të huajt, e kemi gabim. Ne, vetë duhet të rrisim një kulturë tjetër mospranimi dhe divorci me të keqen e me krimin, qoftë ai edhe me mbrojtje politike.
