62 deputetë të parlamentit të Malit të Zi, morën pjesë në votim, 42 votuan pro qeverisë dhe 20 të tjerë, kundër
Kryeministri i Malit të Zi, Milo Gjukanoviç, ka arritur të marrë votëbesimin nga Parlamenti i këtij vendit vetëm falë dy deputetëve shqiptarë që votuan pro. Legjislativi i vendit të vogël fqinj ka gjithsej 81 deputetë dhe për të miratuar një ligj apo për të dhënë votëbesimin duhen 42 vota në favor.
Opozita proserbe ndoqi një taktikë ndryshe, duke mos qenë e tëra në “Kuvend” siç quhet legjislativi dhe ka qëndruar vetëm një pjesë. Në seancën e mbrëmshme kanë qenë prezentë 62 parlamentarë, nga ku 42 votuan pro dhe 20 kundër.
Dy deputetet shqiptarë, Genci Nimanbegu dhe Nik Gjeloshaj ishin vendimtarë për vazhdimin e qeverisjes. Por kjo votë ka shkaktuar reagim ndër publikun shqiptar, të cilët kanë kritikuar ashpër votën pro pa marrë një koncension paraprak, dhe siç ka ndodhur gjithmonë shqiptarët e kanë pësuar.
Në fjalimin përmbyllës të tij për arsyetimin e votës, deputeti Nik Gjeloshaj bëri disa kërkesa për qeversijen si: zgjedhjet e reja lokale në Tuz deri në fund të vitit, përkrahje nga shumica e re për ndryshimin e ligjit për zgjedhjen e deputetëve dhe këshilltarëve, që shqiptarëve ju kthehen të drejtat nga ligji i kaluar si dhe në qeverinë e re të ketë ministrinë nga partitë shqiptare, që duhet të bëhet rregull si ligj për të gjitha qeveritë e ardhshme. Në lidhje me këtë kryeministri Gjukanoviç në fjalën e tij përmbyllese nuk përmendi fare këto kushte nëse do të plotësohen apo jo.
Pikërisht këtë qëndrim të Gjykanoviçit, shqiptarët e kanë cilësuar arrogant dhe kanë kritikuar votën apriori të dy deputetëve.
