Në minierën e Balgjajt në Dibër dyshohet se janë të bllokuar nga shembja e masivit ose nga një shpërthim gazi një inxhinier dhe dy punëtorë. Bëhet fjalë për inxhinierin Ismail Hoxha dhe dy punëtorë.
Kryebashkiaku i Dibrës, Dionis Imeraj tha për ABC News se nga informacionet e para që ka nga vendi i ngjarjes bëhet fjalë për një shembje të një masivi brenda në minierë.
Ndërkohë që një banor i fshatit në Balgjaj, ku ndodhet miniera, nga vendi i ngjarjes i tha ABC News se policia ka mbërritur, por nuk mund të ndërhyjnë në minierë, pasi janë në pritje të grupit të avari shpëtimit në miniera, që të vijë nga Tirana.
Kjo pasi në minierë nuk mund të futesh pa ardhur specialistët, pasi mund të përbëjë rrezik nga gazi. Kryeplaku i fshatit i tha ABC News se në minierë punojnë mbi 20 punëtorë, ndërsa inxhinieri Ismail Hoxha është nga Peshkopia.
Këto janë pamjet nga dhoma e zhveshjes së minatorëve, ku kolegët gjetën teshat dhe telefonat e inxhinierit e dy punëtorëve, por jo ata, pasi dyshohet se janë bllokuar brenda në galeri.
Nga Peshkopia miniera ndodhet rreth 3 orë, kurse të vetmet makina, me të cilat mund të arrish në vendin e ngjarjes janë të transportit të kromit ose druve, pasi terreni është shumë i vështirë.
