I riu shqiptar, Aleksandër Luca, ka folur për herë të parë nga burgu për vrasjen e studentes greke Eleni Topaloudi. Në një intervistë për “Star Tv”, ai ka komentuar deklaratat e bashkëpunëtorit të tij lidhur me ngjarjen që tronditi Greqinë vite më parë.
“Nuk më intereson çfarë del dhe çfarë thotë greku. Unë kam një avokat,“ tha ai pasi shoku i ngushtë drejton gishtin nga ai për vrasjen e 21-vjeçares. Deklaratat e tij nxitën edhe reagimin e babait të të ndjerës, i cili gjithashtu nuk e la ngjarjen të kalonte pa rikujtuar humbjen e të bijës.
“E vërteta është e qartë për ne. Ata të dy bënë atë që bënë. Nëse duan, të vërtetojnë se cili nga të dy e goditi, cili nga të dy i vuri thikën, cili nga të dy e hodhi në det, le ta bëjnë,” tha Giannis Topaloudis, duke argumentuar se një person nuk mund ta bënte i vetëm krimin.
Ngjarja e rëndë ndodhi mbrëmjen e 28 nëntorit 2018, ku 21-vjeçari grek Manolis Koukouras dhe 20-vjeçari shqiptar Aleksandër Luca dhunuan dhe vranë studenten greke Eleni Topaloudi. Luca dhe Koukouras akuzojnë njëri-tjetrin për vrasjen e 21-vjeçares mbrëmjen e 28 nëntorit.
