Policia e Shtetit ka reaguar pas tre muajsh për ngjarjen që ngjalli interes në media këto ditë lidhur me një 22-vjeçare nga Kenia që dyshohet se është dhunuar brutalisht në Tiranë dhe prej tre muajsh ndodhet në spital në gjendje të rëndë.
Policia tentoi të fshihte ngjarjen deri në momentin që u bë mediatike pas denoncimit të mamasë së vajzës. 22-vjeçarja me origjinë nga Kenia J.A po lufton për jetën në një spital të Tiranës, pasi u gjet pa ndjenja poshtë pallatit ku banonte në një apartament në katin e dytë.
E reja ishte e punësuar në një Kazino në qendër në Tiranës, kur më 13 gusht të këtij viti ajo u zhduk papritur rreth orës 03:25 deri në orën 07:00 të mëngjesit. Më pas ajo u gjet në gjendje kritike për jetën në rrethana të paqarta, në trotuar. 22-vjeçarja u dërgua me urgjencë në spital nga banorët e zonës, ndërsa mjekët thanë se ajo erdhi me tre brinjë e kocka të thyera, lëndime në dorë e stomak dhe dëmtime në tru.
Lexo edhe: Kush ka tentuar ta vrasë vajzën keniane në Tiranë? Flet e ëma: Shoferi i kërkonte s*ks
Njoftimi i policisë:
Sqarim i Drejtorisë Vendore të Policisë Tiranë
Më datë 14.08.2022, një shtetase nga Kenia ka bërë denoncim për humbjen e kontakteve me shoqen e saj, shtetasen J. A., 22 vjeçe, nga Kenia, banuese në një banesë me qira, në rrugën “Pandeli Evangjeli”, e cila më pas u gjet pa ndjenja, në afërsi të banesës së saj.
Në lidhje me këtë rast sqarojmë se Komisariati i Policisë Nr. 1 ka vlerësuar denoncimin e bërë dhe ka reaguar në kohë. Në përfundim të veprimeve të para hetimore për këtë rast janë referuar materialet në Prokurorinë pranë Gjykatës së Rrethit Gjyqësor Tiranë, e cila ka regjistruar procedimin penal, për veprën penale “Plagosja e rëndë me dashje”.
Gjithashtu, sqarojmë se strukturat hetimore të Komisariatit të Policisë Nr. 1 Tiranë kanë kryer të gjitha veprimet hetimore të deleguara nga Prokuroria, për sqarimin e rrethanave të këtij rasti.
