Janë zbardhur të tjera detaje nga vrasja e sipërmarrësit Arjan Ferracaku ditën e djeshme në Shkodër.
Burime kanë zbuluar se bashkë me të në momentin e ngjarjes kanë qenë dy persona, miku i ngushtë dhe djali i xhaxhait, ndaj të cilëve është qëlluar gjithashtu me breshëri automatiku dhe kanë shpëtuar mrekullisht.
Mësohet se të dy ata janë mbajtur thuajse 12 orë në komisariatin e policisë së Shkodrës, si dëshmitarë kyç.
Ato kanë rrëfyer para grupit hetimor që kishin dalë për kalërim në Livade, siç bënin shpesh dhe aty kishin lënë takim me dy miq të tyre, të cilët gjithashtu janë të apasionuar pas hipizmit.
Sapo kanë mbërritur në zonë, nga pas shkurreve janë dëgjuar breshëri automatiku, ndërsa kuajt janë trembur duke i rrëzuar në tokë të tre ata.
Të zënë nga paniku kanë vrapuar për t’u larguar. Kanë hyrë në kanale dhe më pas në shtigje duke dalë në shtëpitë e tyre që i kanë në “zooteknike”, zonë e afërt me Livadet.
Ata kanë menduar se të njëjtën gjë ka bërë dhe 30 -vjeçari Arjan Ferracaku.
Kur ata kanë parën kalin e lënduar në këmbë kanë kuptuar situatën dhe janë kthyer në vendngjarje, ku e kanë gjetur të pajetë Arjan Ferracakun.
