Nga Rexhina Biba
Plazhi i Spillesë është shndërruar tërësisht këtë sezon veror. Dikur vijën bregdetare të këtij plazhi e shikonim të rrëmujshëm, të pa sistemuar, jo të pastër dhe aspak të rregullt, megjithë mundësitë e shumta, madje kuruese të tij, për shkak të dendësisë së rërës, detit të mbrojtur nga ndotjet dhe ajrit të pastër prej pishave të shumta.
Pas ndarjes së re territoriale ky plazh i kaloi Bashkisë së Rrogozhinës dhe një ndër pikat kryesore të programit elektoral të kryebashkiakut ishte pikërisht zhvillimi i vijës bregdetare dhe rritja e turizmit në këtë zonë.
Tani Spilleja nuk është më ajo e dikurshmja, por ka marrë nje pamje krejt tjetër. 
E gjithë vija bregdetare është bërë uniformë. Lokalet dhe restorantet janë ndërtuar të gjitha me dërrasa, çadrat janë të gjitha prej kashte, palmat duken hijerënda mbi pushuesit, gjithashtu, pedonalja e krijuar i lejon të gjithëve të sodisin pamjen e re gjatë ditës dhe gjatë natës.
Një risi tjetër që vihet re këtë sezon janë rojet bregdetare, ku çdo kullë vrojtimi ka nga dy persona vigjilentë për gjithçka ndodh rreth e rrotull, përpos tyre janë vendosur dhe disa të rinj si policë bashkiakë që lëvizin përgjatë pedonales në këmbë ose me biçkletë për të ndihmuar pushuesit me informacione ose për të ndihmuar fëmijët që humbasin nga sytë e familjes.
Por, jo çdo gjë është perfekte në Spille. 
Rojeve bregdetare i mungojnë materialet bazë për kryerjen e funksionit të tyre, fjala vjen dylbitë dhe materiale të tjera që mund t’u hyjnë në punë. Një problematikë tjetër ishte dhe mungesa e punonjësve për pastërtinë e rërës në pjesën publike të plazhit, gjithashtu dhe në pjesën e pishave, ku mbeturinat shiheshin kudo. Por, nga informacionet që morëm pritej qe këto gjëra rregullohen shumë shpejt.
Para pak javësh administrata e Bashkisë së Rrogozhinës u organizua në një aksion ku u pastruan sipërfaqet e pishave në Spille, Greth dhe Bashtovë. Në këtë mënyrë ata dhanë mesazhin e tyre për të mbajtur pastër ambientet ku pushojmë.
Pas plazhit të Spillesë e ka rradhën plazhi i Bashtovës. Kështu puna e tyre do të kompletohet plotësisht.
