Arben Derhemi është një nga artistët që ka kundërshtuar prej fillimit shembjen e Teatrit Kombëtar. Të njëjtin qëndrim ka mbajtur edhe sot në takimin e artistëve me kryebashkiakun Veliaj.
Ai theksoi se komuniteti i artit nuk do të lejojë të preket asnjë centimetër nga godina aktuale e teatrit. “Falenderoj artistët e Operas që erdhën këtu sot. Do ishte mirë që të kishin ardhur në protestat tona dhe të mos na linin vetëm. Nuk e di pse keni ardhur sot, por gjithsesi e vlerësoj. Kemi biseduar me shokët dhe miqtë, kolegët gjithashtu dhe kemi arritur në konkluzionin që ca e duan të verdhë, ca të bardhë e ca të kuq. Çdo centimetër i Teatrit Kombëtar është vend i shenjtë. Ai nuk do të cënohet, e ka thënë edhe Ndrenika, “është Jeruzalem”. Aty fillon dhe aty mbaron konsensusi me ne. Në rast se bisedimet fillojnë në momentin që territori nuk cënohet, ne aty po deshe ulemi dhe hamë ndonjë darkë e pimë ndonjë gotë verë. Sa për tironsit, tironsit duhet të kenë një identitet. Kullat 40 katëshe dhe 60 katëshe, janë mungesë kulture dhe mungesë vizioni”, tha Derhemi.
