Deputeti i Kuvendit të Sllovenisë ka dhënë dorëheqjen nga ky post vetëm pak orë pasi u ka treguar kolegëve të tij se kishte realizuar “një eksperiment shoqëror”, duke shmangur pagesën në një fast food afër ndërtesës së Parlamentit, ku kishte marrë një sanduiç.
Deputeti Darij Krajçiç, gjatë debatit në Këshillin e Kuvendit rreth mekanizmave të kontrollit të produkteve ushqimore, duke dashur ta qartësojë atmosferën, tha se mekanizmi i kontrollit ndikon mirë nëse të gjithë i përmbahen. Por ai ka theksuar se ka edhe raste kur pagesat nuk bëhen duke iu referuar rastit vetjak.
Ai ka denoncuar vetveten publikisht meqë kishte marrë një sanduiç dhe kishte shmangur arkën. “Prita të paguaj, sigurisht disa minuta, por ata po bisedonin dhe s’e kishin mendjen te unë. Për këtë arsye dola pa paguar. Dhe askush nuk më ndoqi ndonëse ka aq shumë kamera që mbikëqyrin”, ka thënë Krajçiç.
Kolegët në Këshillin parlamentar menduan se bënte shaka por ai e qartësoi se më vonë u kërkoi falje arkëtarëve dhe bëri publike dorëheqjen e tij nga mandati i deputetit.
