Dega e Partisë Demokratike në Durrës, ka denoncuar ndarjen e fondeve të rindërtimit që sipas saj bëhet për të vjedhur vota në zgjedhjet e ardhshme. Në deklaratën e selisë blu thuhet se partia-shtet ka nisur me mekanizmat e saj anti-kushtetues tjetërsimin dhe vjedhjen e votës.
“Ja pra, ujku qimen e ndërron por zakonin nuk e harron. Vazhdon batërdia zgjedhore që në prag të shpalljes së datës së zgjedhjeve të pjesshme lokale. Pavarësisht rrethanave, situatave dhe raportit të OSBE/ODIHR për masakrën zgjedhore të 25 Prillit, partia-shtet sapo nisi me mekanizmat e saj antikushtetuese për ndikim, tjetërsim apo dhe vjedhjen e votës së qytetarëve durrsakë” – thuhet në deklaratë.
Më tej, thuhet se pikërisht në këtë kohë, një muaj para zgjedhjeve lëvrohen fonde për rindërtimin, ku ka familje që prej më shumë se 2 vitesh nuk marrin asgjë e janë në diell të hapur.
“Pse pikërisht tani lëvrohen fonde për rindërtimin, ku ka familje që prej më shumë se 2 vitesh nuk marrin asgjë e janë në diell të hapur?! Pse bonusi i qirasë, me 3 muaj prapambetje, nis të shpërndahet pikërisht tani në prag të zgjedhjeve? Qytetarët durrsakë ndihen të vjedhur e të prerë në besë nga premtimet tuaja boshe por kurrsesi nuk mund t’i fyeni inteligjencën asnjërit prej tyre. Shpërblimi me qëllim vjedhjen e votës dënohet me ligj. Nuk do jetë e largët dita kur kjo të ndodhë” – thuhet në deklaratën e PD-së Durrës.
