Nejmar është një nga emrat më të diskutuar kohët e fundit, pasi ka vendosur të largohet nga PSG-ja dhe e ardhmja e tij nuk dihet akoma se ku do të jetë.
Thuhet se sulmuesi brazilian ka pasur një takim ditën e djeshme me drejtorin sportiv Leonardo, ku mesohet se i ka shprehur dëshirën e tij për të kaluar vetëm te Barcelona. Në këtë mënyrë 27-vjeçari i ka bërë të ditur klubit francez se nuk dëshiron të kalojë as te Juventusi as te Real Madridi, të cilët kanë shfaqur interes për ta pasur në skuadrat e tyre, por dëshiron vetëm kalimin te katalanasit.
Për këtë arsye një delegacion nga Barcelona është nisur drejt Parisit, për të bërë një ofertë përfundimtare për Nejmarin. Oferta mendohet të jetë rreth 170 milionë euro, dhe në marrëveshje mund të futet edhe kartoni i Osman Dembele, për të cilin parisienët kanë shfaqur interes kohët e fundit.
Katalanasit kanë një avantazh pasi lojtari ka shprehur dëshirën për t’u rikthyer në “Kamp Nou”, megjithatë Juventusi dhe Real Madridi akoma janë në pritje për të marrë një përgjigje në lidhje me sulmuesin, i cili ka shumë pak mundësi të qëndrojë në “Parc de Prince”.
/PANORAMASPORT.AL/
