Pas deklaratave të ambasadorit amerikan në Tiranë, Donald Lu, për klanet kriminale dhe 20 familjet mafioze, ka reaguar kryetari i PD, Lulzim Basha.
Gjatë një deklarate për shtyp, Basha tha se është koha që ndërkombëtarët të nxjerrin emrat e politikanëve të lidhur me krimin, ndërsa shtoi se është politika ajo që i ka dhënë mbështetje.
“E para gjë që duhet bërë është goditja e kupolës kriminale në politikë. Ngritja e krimit të organizuar është produkt i investimit të krimit në politikë dhe e politikës te krimi. Krimi ka mbështetur Ramën në zgjedhje, ndërsa Rama e ka mbështetur duke i dhënë pushtet. Duhet të shpërbëhet lidhja e shtetit me krimin. Flitet për mafia dhe për mbështetjen politike. PD ka denoncuar me emra elementët kriminalë. Por Edi Rama nuk e lufton krimin sepse ka një pak me krimin dhe e ka shpalosur në zgjedhjet e Dibrës, Korçës, zgjedhjet e fundit. E rëndësishme është që faktori ndërkombëtarë ka filluar të flasë me fakte konkrete, të verë pikën mbi ‘i’ cilët janë politikanët të lidhur me krimin e organizuar, kujt i shërbejnë këta politikanë të lidhur me familje mafioze? Shndërruan Shqipërinë në prodhuesin më të madh të drogës, në eksportuesin më të madh të kanabisit“, tha Basha.
Kreu i PD i është referuar edhe deklaratës së Ramës një ditë më parë për ardhjen e agjentëve nga SHBA, të cilët do asistojnë institucionet shqiptare. “Nuk e zgjidh një apo 15 agjentë, kjo është për të hedhur hi syve, luftën e bëjnë institucionet shqiptare”.
