Pas angazhimit të grupimit të CDU/CSU për të negociuar për krizën politike në Shqipëri ka ardhur edhe reagimi i kreut të Partisë Demokratike, Lulzim Basha.
Basha shpreh mirënjohjen ndaj Gjermanisë si mbështetëse e Shqipërisë dhe shqetësimin e tyre ndaj problemeve që kanë penguar integrimin europian.
Ndër të tjera Basha thekson se është në pritje të Gjermanisë mike në Shqipëri për të zgjidhur krizën dhe për ti dhënë drejtim gjithë situatës.
“Mirënjohje Gjermanisë mike dhe mbështetëse të Shqipërisë, për vëmendjen dhe shqetësimin ndaj problemeve që kanë penguar integrimin europian, si mungesa e zgjedhjeve të lira dhe të ndershme, lidhjet e politikës me krimin, mungesa e luftës ndaj krimit dhe korrupsionit. Në emër të PD dhe të Opozitës së Bashkuar konfirmoj gatishmërinë tonë për zgjedhje të lira dhe të ndershme dhe mirëpres angazhimin e Gjermanisë mike për zgjidhjen e kësaj krize dhe hapjen e rrugës europiane të Shqipërisë.”- shkruan Basha.
Ditën e sotme partitë gjermane CDU/CSU kanë reaguar nëpërmjet një prononcimi duke u shprehur se situate politike ka nevojë për zgjidhje të menjëhershme, duke u dhënë kështu mesazhin shqiptarëve se dita e zgjedhjeve lokale duhet të shtyhet.
