Reshjet e dendura të dëborës të shoqëruara dhe me ngrica të shumta kanë shkaktuar problemet e para me qarkullimin rrugor në veri dhe verilindje të vendit.
Emergjencat Civile kanë paralajmëruar marrjen e masave konkrete për parandalimin e rreziqeve.
Nuk ka zona të izoluara nga reshjet, por vështirësi në qarkullimin e automjeteve raportohet në disa akse rrugore.
Reshje të dendura dëbore ka edhe në “Rrugën e Kombit”, por nuk raportohet për vështirësi në qarkullimin e automjeteve.
Si pasojë e ngricave në rrugë, drejtuesit e mjeteve udhëzohen të përdorin zinxhirët në keto akse rrugore:
Fushe Arrez – Iballe
Fushe Arrez – Qafe Mali – Qafe Shllak
Qafe Mali – Fierze.
Bajram Curri – Valbone
Kukes – Qafe Shllak
Tunel i Kalimashit – Morine.
Sipas Shtabit të Emergjencave, aktualisht paraqitet vështirësi në kalimin e automjeteve në disa segmente rrugore të Malësisë së Madhe dhe Kukësit dhe po punohet për hapjen e tyre:
Qafe Mali – Dardhe, në zonen e Pukës
Qafe Thore – Theth, në zonën e Malesise se Madhe
Tamare – Vermosh
Bushtrice, Kukës – Kala e Dodes, Diber.
Trashësia e dëbores në to shkon nga 20 cm deri në 50 cm.
Prezence dëbore ka edhe në ‘Rrugën e Kombit’ ku punojnë borepastrueset.
Komisionet e Emergjencave Civile në Qarqe dhe Drejtoria e Përgjithshme e Emergjencave Civile në MPB po ndjekin situatën duke e shoqëruar me masa përkatëse në terren.
