Nigel de Jong duket se vazhdon të jetë krenar për reputacionin e tij si një futbollist shumë i ashpër, madje nuk nguron që me ndërhyrjet e tij herë pas here t’i kalojë përmasat e një qënie humane normale. Në ndeshjen e fundit të kampionatit elitar amerikan, ndërhyrja e tij ndaj mesfushorit të Portland Timbers, Darlington Nagbe ishte vërtetë horror, aq sa futbollisti i dëmtuar u detyrua ta lërë stadiumin mbi një karrike me rrota. Reagimi i publikut, por edhe i shtypit ka qenë i menjëhershëm, duke e konsideruar futbollistin e Kombëtares së Hollandës si një njeri të rrezikshëm.
Dhe mbi të gjitha, arbitri i ndeshjes Alen Çapman e ka ndëshkuar de Jong vetëm me karton të verdhë. E gjitha kjo ka sjellë sërish në memorje goditjen “karate” të finales së Botërorit 2010, kur takat e holandezit u përplasën dhunshëm në gjoksin e Ksavi Alonsos, madje edhe atëherë nuk u ndëshkua me kartonin e kuq. Futbollisti që e ka filluar karierën tek Ajaksi i Amstërdamit ka luajtur edhe për klube të tjera elitare të Europës, ndërsa tani aktivizohet me fanelën e LA Galaksi.
