Pamjet e publikuara së fundmi hedhin më shumë dritë mbi zjarrin masiv që përfshiu disa ditë më parë pallatin në kompleksin “Arlis”, pranë zonës së Farmacisë 10 në Tiranë.
Nga videoja e momenteve të para, vihet re qartë se flakët nisin nga një grumbull kartonash të vendosur në ambientet e jashtme, pranë hyrjes së Big Market.
Fillimisht zjarri duket i vogël, por më pas përhapet me shpejtësi drejt fasadës së pallatit, duke u kthyer në një situatë të rrezikshme për banorët.
Deri tani, nuk ka indicie që zjarri të jetë vendosur qëllimisht. Dyshimet kryesore janë se ai mund të jetë shkaktuar nga një bisht cigareje i hedhur mbi kartonat, ose nga ndonjë shkëndijë elektrike e mundshme nga pajisjet e kondicionimit pranë zonës.
Flakët përfshinë godinën për më shumë se 6 orë, në një ndërhyrje intensive të zjarrfikësve që luftuan për të vënë situatën nën kontroll.
Fatmirësisht, nuk pati persona të lënduar, por dëmet materiale janë të konsiderueshme.
Kujtojmë se ky rast rikthen edhe njëherë shqetësimin për sigurinë në ambiente të përbashkëta dhe menaxhimin e mbetjeve të rrezikshme pranë bizneseve dhe pallateve.
Ndërkohë, policia ka nisur hetimet dhe deri më tani ka proceduar penalisht disa persona, ndërsa priten rezultatet përfundimtare për të përcaktuar shkakun e saktë të zjarrit.
