Erion Veliaj ka vendosur të blindojë Tiranën me 25 maj në kuadër të Conference Legague. Të paktën, kështu ka deklaruar ditën e sotme kryebashkiaku i Tiranës. Gjatë një deklarate publike ai foli për masat që do të futen në fuqi ditën e nesërme në kuadër të finales së madhe të Conference League në Shqipëri. Tirana do të jetë e ‘blinduar’ njëjtë si dy vizitat e mëdha që kanë ndodhur në Tiranë, ajo e George Bush dhe Papa Françekut, tha Veliaj.
“Na duhen të gjitha trupat në terren, ka disa njerëz që nuk i përballojnë mirë emocionet, na duhen shumë trupa në terren, ata që dinë të komunikojnë se do ketë njerëz që do duan orientim. Ne kemi përgatitur 3 zona fansash, do të jetë qendra, sheshi ‘Skëndërbej’. Tifozët e Romës do të jenë te amfiteatri, ndërsa pjesa tjetër te Pedonalja e Tiranës. Nesër do të jetë dita pa makina, transporti publik do të jetë në qarkullim.
Mos e merrni rrugën për të ardhur në Tiranë, qyteti do të zbatojë protokollin që ndoqi në vizitën e Bush apo të Papa Françeskut. Qyteti do të hermetizohet. Pa një biletë për ndeshjen nuk futeni dot në Tiranë. Thirrja për të gjithë qytetarët, mos e merrni mundimin kot. Qytetarët e Tiranës të lëvizin sa më shumë në këmbë, sa më shumë me biçikleta”, deklaroi Veliaj. Sakaq, nuk e dimë se çfarë zgjidhje do të japë Veliaj për ata që punojnë dhe vijnë çdo ditë nga rrethet në Tiranë.
