Policia ka ndaluar mbrëmjen e sotme Ismail Morinën, të njohur edhe si Ballist Morina. Lajmi është bërë me dije nga Syri. Në artikullin e tyre shkruhet se shkak për këtë ndalim policor është bërë një status që aktivisti i çështjeve kombëtare, ka bërë në Facebook.
Para 4 orësh, Morina shkruan se sapo kishte mbërritur në Tiranë dhe më pas është ndaluar nga Policia.
‘Kam marr vesh qe Vuçiça don me ardh në samit nesër, ia kishin pas mbush mendjen pasi i kishin ofru do karamele ZANA,unë sapo zbrita në aeroportin NANA TEREZË, nji palë syze t’moçme i kam marrë me vete,amanet i vjetër prej POTOÇARI janë…,”-është mesazhi i Ballist Morina në Facebook, për të cilin policia e ka ndaluar gjatë ditës së sotme.
Kush është Ismail Morina?
Ballist Morina, emri i vërtetë i të cilit është Ismail Morina u bë i njohur pasi ngriti dronin me simbolet etnike në ndeshjen Serbi-Shqipëri. Në minutën e 41 të saj, Morina i fshehur në majë të stadiumit lëshoi dronin me flamurin pro-shqiptar, duke bërë që lojtarët serbë të tensionohen dhe ta marrin atë.
Por si kundërpërgjigje, lojtarët shqiptarë nuk e lanë ta merrnin duke e marrë ata në dorë. Më pas ndeshja vijoi me goditje nga të dyja palët derisa u ndërpre pasi tifozët serbë filluan ti gjuanin lojtarët e kombëtares shqiptare. Pas ndeshjes, Shqipëria e fitoi ndeshjen në tavolinë me rezultatin 3-0.
