Nga Edi Oga
Mëngjes herët. U nisa për tek dyqani për të blerë qumësht. Gjithë rrugës kisha një si siklet, të cilin e kuptova kur mbërrita në dyqan; kisha dalë pa maskë. M’u duk vetja si serial killer, megjithëse COVID-in e kam kaluar dhe as nuk e jap, as nuk e marr.
Ata që ishin në dyqan më panë se isha pa maskë, por asnjë nuk më foli, përveç ndërgjegjes sime. Ajo e detyroi dorën time të djathtë të kapë krahun tim të majtë dhe ta tërheqë me forcë. Ndërkohë gojën e detyroi që të bërtiste disa herë “shko merr maskën!”. Njerëzit kthyen kokat dhe më panë të habitur, teksa luftoja për të nxjerrë për krahu veten time, nga dyqani!
“Çfarë i bën vetes, o gomar?!”,- foli njëri prej tyre.
“Kam dalë pa maskë dhe po e largoj veten me dhunë”, i them.
“Ti paske ikur nga mendorja, o zotni, a kapet vetja prej krahu?!”,- tha një tjetër.
“Jo, por ai që të kap prej krahu dhe të largon, kur je pa maskë, nuk e blen qumështin te ky dyqan!”.
Prita që ndonjëri prej tyre të kuptonte “lojën” time, por nuk ndodhi. Vetëm një zonjë më fiksoi me sy dhe më tha:
“Ore, ku të kam parë unë ty?”
“Në televizor, i them, jam kushëriri i asaj që del te “Përputhen 40+”!
“Uaa… po ti qenke i famshëm! A bëjmë një sellfi?!”
Bëra selfie me të gjithë. Edhe me shitësen.
