Pas marrëveshjes me Rusinë në Stamboll, Ukraina ka nisur normalisht eksportin e grurit, përfshirë këtu dhe me Shqipërinë. Mësohet se një anije me kapacitet rreth 6 mijë tonë e mbushur me grurë nga Ukraina po udhëton drejt portit të Durrësit. Anija “cargo” e quajtur “Joahar Ranim” është nisur direkt nga Izmaili i Ukrainës, porti më i madh ukrainas, në Odesa.
Aktualisht “Jaohar Ranim” ndodhet në ujërat greke të Jonit, ndërsa pritet që ankorimin në portin e Durrësit ta bëjë më 10 gusht. Anija mësohet se është ngarkuar me grurë më 28 korrik, ndërsa është anija e parë që bën këtë rrugë që nga nisja e pushtimit të Ukrainës nga Rusia më 24 shkurt të këtij viti.
Pavarësisht se çmimi i grurit në tregjet botërore është ulur me 2% ende nuk ka pasur asnjë reagim nga Bordi i Transparencës.
Kujtojmë që çmimi i bukës masive në Shqipëri, u rrit nga 80 lekë që ishte para konfliktit në Ukrainë në 120 lekë, një çmim që vazhdon dhe sot. Pritet një ndërhyrje e Bordit të Transparencës që qytetarët të ndihen të lehtësuar nga çmimet e larta të produkteve të shportës.
Me mbërritjen e grurit ukrainas në Shqipëri, pritet që çmimi i grurit në tregun vendas të ndryshojë, por fjala e fundit i mbetet Bordit të Transparencës. Kujtojmë që pak kohë më parë, Bordi i cili është ngritur si institucion rregullator i çmimeve u kritikua tej mase për çmimin e lartë që vendosi për naftën, ndërkohë që në bursë çmimi i saj shënonte ulje rekord.
