Në Kuvend është dorëzuar raporti vjetor i Prokurorit të Përgjithshëm mbi gjendjen e kriminalitetit për vitin 2021. Në fjalën e tij para deputetëve, kryeprokurori Olsian Çela tha se përgjatë vitit të shkuar ka pasur disa problematika lidhur me prokuroritë në vend. Sipas tij, problemi kryesor me të cilin përballet organi i akuzës është pastrimi i parave. Por për luftimin e tij nuk bëhet mjaftueshëm, Çela tha se prokuroritë nuk hetojnë mjaftueshëm. Ndërsa si më problematike për Prokurorinë e Tiranës.
“Ne ligjet i kemi shumë të mira. Problemi jonë është zbatimi. Policia gjyqësore. OPGJ nuk kishte asnjë të dhënë. Grupi i kontrollit ka qëndruar nga 6 muaj deri në një vit për të gjetur dosjen. Kemi bërë maksimumin. Kemi nxitur në çdo mbledhje.”
Ndërsa Olsian Çela tha se ndaj tij nuk ka pasur kurrë asnjë presion politik, ndërsa shtoi se sot prokurorët trajtohen më mirë se në të gjitha kohërat, duke i cilësuar si “zotër” të hetimeve dhe të paprekshëm. Por drejtoi gishtin nga krerët e Prokurorive, që sipas tij duhet që të japin më shumë llogari. Për Çelën të gjitha ata që nuk kryejnë siç duhet detyrën duhet që të përballen me pasojat. Më tej, ai tha prokuroria ka nevojë për kohezion në mënyrë që të veprojë si organ i tërë. Çela tha se duhet që të ketë disa instrumente që t’i bëjë këta prokurorë të japin llogari para KLP-së.
Sa i përket përqindjes së kriminalitetit për 100 mijë banorë, më të ulëtin e ka qarku i Dibrës dhe më të lartin e ka qarku i Vlorës. Por së fundmi, rritje të kriminalitetit sipas kryeprokurorit ka pasur në qarkun e Kukësit, me jo pak por 36%.
Krahasuar me vitin 2020, 0,52 % e këtij raporti ka rritje në procedimet për krime dhe rritje në procedimet për kundravajtje penale. Nga këto janë evidentuar rritje prej 19,93% të krimeve të kryera nga punonjësit shtetëror. Gjatë vitit 2021, gjithashtu, është vendosur pezullimi i hetimeve për 8864 procedime për shkak se autori s’njihet apo nuk është zbuluar autori i veprës penale.
