Ceferin “fshikullon” rebelët: Super League përpjekje e pacipë e oligarkëve

0
71

Aleksander Ceferin, presidenti i UEFA, gjatë kongresit të UEFA-s që u mbajt në Vjenë, i është rikthyer temës së Super League, që e mbajnë ende gjallë klube si Real Madrid, Juventus dhe Barcelona.

Ashtu si herët e tjera, i pari i futbollit në Europë, nuk kursehet ndaj atyre që deshën të bëjnë revolucionin e futbollit europian vetëm për shkak të interesit të tyre.

“Super League ishte një përpjekje e pacipë e disa oligarkëve dhe aristokratëve për të nisur një projekt kundër të gjitha vlerave të futbollit dhe shoqërisë europiane. Ne duhet të vazhdojmë të inkurajojmë peshqit e vegjël, që të luftojnë për të mundur gjigantët. Ligji dhe morali janë në anën tonë”, ka thënë Ceferin.

“Kur jemi të bashkuar, askush nuk mund të na mundë. Kur UEFA braktis interesat e veta, fiton futbolli. Kur arrin të organizojë një kampionat europian, fiton futbolli. Kur UEFA nis një kompeticion si Conference League, fiton futbolli.

Kemi ndihmuar federatat dhe klubet, kemi shpenzuar 97% të të ardhurave për futbollin. Kur UEFA bie dakord me ECA për formatin e garave, fiton futbolli. Kur UEFA përballet me milionerë që mendojnë se mund të blejnë gjithçka, fiton futbolli”, është shprehur presidenti i UEFA gjatë asamblesë.