Anëtari i Këshillit Kombëtar të Partisë Demokratike, Jonathan Pano, ka ngritur alarmin për atë që e cilëson si një emergjencë kombëtare, duke denoncuar largimin masiv të të rinjve nga Shqipëria.
Në një deklaratë për media, Pano iu referua të dhënave të Eurostat-it, sipas të cilave vendi ka shënuar rënien më të madhe të popullsisë së re në Europë, duke e lidhur këtë fenomen me politikat e qeverisë Rama dhe duke u bërë thirrje qytetarëve të bashkohen në protestën kombëtare të 10 shkurtit përpara Kryeministrisë.
Deklarata
Sot, Shqipëria nuk po përballet thjesht me një lëvizje demografike, por me një gjakderdhje kombëtare që po i shteron vendit energjinë e tij më jetike: Rininë. Partia Demokratike ka paralajmëruar prej kohësh se politikat e kësaj qeverie do të çonin në një shkretim të qëllimshëm të vendit, dhe sot shifrat e Eurostat-it janë vula e dështimit të regjimit të Edi Ramës.
Të dhënat më të fundit janë tronditëse. Shqipëria ka shënuar rënien më të madhe të popullsisë së re në të gjithë Europën gjatë vitit të kaluar.
-Në janar 2025, kjo grupmoshë (15-29 vjeç) numëronte 405,832 të rinj. Brenda 12 muajve, janë larguar ose zhdukur nga statistikat tona 18,300 të rinj. Kjo është një tkurrje me -4.32%, një shifër që tregon se çdo ditë, dhjetëra të rinj e shohin të ardhmen e tyre larg kufijve të atdheut.
Kjo nuk është thjesht një shifër; janë 18 mijë ëndrra, 18 mijë mendje aktive dhe 18 mijë krahë pune që kanë zgjedhur të ndërtojnë fatin e tyre diku tjetër, sepse vendi i tyre u ktheu shpinën.
E thënë thjeshtë, çdo 30 minuta një i ri është larguar për te mos u kthyer më.
Ky nuk është një proces natyror. Ky është një projekt i mirëmenduar politik i qeverisë Rama. Një Shqipëri pa të rinj është një Shqipëri pa revoltë; një Shqipëri e boshatisur është më e lehtë për t’u kontrolluar dhe për t’u plaçkitur..
Të rinjtë po ikin sepse nën këtë qeverisje:
Meritokracia ka vdekur: Vendi i punës nuk fitohet me diplomë, por me teserën e partisë ose me lidhje korruptive;
Kostoja e jetesës është e papërballueshme: Ndërsa qeveria mburret me suksese imagjinare, familjet e reja nuk përballojnë dot as qiranë e as shportën bazë të ushqimeve;
Pasiguria është ulur këmbëkryq: Korrupsioni në çdo nivel ka asgjësuar besimin se në këtë vend mund të ndërtosh jetën me ndershmëri;
Zbrazja e vendit po sjell pasoja që do t’i vuajmë për dekada. Shkollat po mbyllen, bizneset po falimentojnë për mungesë stafi, dhe sistemi i pensioneve po shkon drejt kolapsit total. Duke dëbuar rininë, kjo qeveri ka dënuar me vetmi dhe varfëri prindërit dhe gjyshërit tanë.
Partia Demokratike e konsideron këtë situatë si një emergjencë kombëtare. Heshtja sot është bashkëfajësi me rrënuesit e vendit.
Shqipëria nuk është e mallkuar që të zbrazet kështu. Ne kemi burimet, kemi pozicionin gjeografik dhe, mbi të gjitha, kemi njerëz të zot. Ajo që na mungon është një qeverisje që punon për qytetarët, jo për një grusht njerëzish.
Ndryshimi nuk vjen përmes statuseve në rrjetet sociale. Ndryshimi vjen kur dhimbja dhe zemërimi kthehen në forcë qytetare.
Prandaj, i bëjmë thirrje çdo prindi që i mungon fëmija, çdo të riu që ndihet i huaj në vendin e vet, dhe çdo qytetari që e dhimbset e ardhmja e këtij kombi: Bashkohuni në protestën kombëtare më 10 shkurt përpara Kryeministrisë
Shqipëria nuk u përket atyre që e vjedhin, u përket atyre që e duan dhe që duan ta ndërtojnë të ardhmen këtu.
Më 10 shkurt, le t’i tregojmë këtij regjimi se rinia dhe Shqipëria nuk dorëzohet!
