Ministri për Europën dhe Punët e Jashtme, Ditmir Bushati theksoi se Shqipëria pret hapjen e negociatave në qershor ndërsa i ka bërë thirrje opozitës që të mos bëhet bllokadë.
“Reforma zgjedhore hap mundësinë e dialogut me opozitën, shpresojmë që shqiptarët që ndodhen jashtë vendit të votojnë në zgjedhjet e ardhshme. Prioriteti kryesor ka lidhje me reformën në drejtësi”, u shpreh Bushati.
Gjatë asamblesë së PS, Bushati tha se në prill ne presim që KE të hapë bisedimet për anëtarësim, që pritet të konkretizohet në samitin e Sofjes dhe samitin e BE në qershor të këtij viti.
Bushati ka folur edhe për negociatat me Greqinë për dosjet e vjetra. “Proces i vështirë, por jemi të vendosur ta trajtojmë në mënyrë strategjike, bazuar në frymën dhe të drejtën europiane dhe për të ndërtuar marrëdhënie me Greqinë të cilat do çlirojnë energji pozitive”, tha Bushati.
