Burrat nëpër lajme janë me kostum, gratë sa më të zhveshura, aq më shumë shanse të bëhen lajm portaleve

Çështje semantike dhe portretizimi. Burrat me kostum tregojnë “seriozitet” të lajmit, burimit, trajtimit të tij (pavarësisht se shumica dërrmuese e teksteve që i shoqërojnë flet për drogë, bomba me fitil të njomë nga këto të emisioneve televizive, akuza për krime, kode si djem rrugësh apo gënjeshtra propagande në mes të ditës me diell). Të gjitha këto trimëri, me kostum!

Ka edhe ndonjë grua tek-tuk me kostum apo pantallona, që ia arrijnë të dalin në lajme për ndonjë çështje “të mërzitshme” si shëndetësia apo ndonjë ligj i tjetërsuar. Po këto janë pika uji.

Shumica e grave e vajzave që janë “të botueshme” e na dalin në ekranin e celularit kur lexojmë lajmet, janë me dekolte, me pjesë trupi të deformuara (a tjetërsuara në përmasa), me ato buzët e çuditshme me silikon, me ca vështrime pak banale, e me pozicionime aq qesharake, sa i bëjnë burrat me kostum të duken edhe më të pavend.

Bëni një kalim të shpejtë të lajmeve online, në cilëndo faqe: burrat citohen për fjalën, gratë për gjininë! Madje, kanë mësuar edhe fëmijët nëpër emisione t’u thonë grave “pjeshkë”.

Burrat objekt fjale! Gratë subjekt seksi! Dhe çuditemi pastaj nga burojnë ngjarjet e stereotipet.

https://www.facebook.com/edlira.gjoni.7