Kryetari i Kontrollit të Lartë të Shtetit, Bujar Leskaj, tha sot se në katër vitet e fundit, institucioni që ai drejton, ka zbuluar shkelje me vlerë 128 miliardë lekë, në administratën publike. Në analizën vjetore të KLSH-së, Leskaj tha se dëmi ekonomik në këto katër vite është 8 herë më i madh se periudha parardhëse.
“Kreu i KLSH-së në analizën vjetore, tha se abuzimet janë tetë herë më të mëdha se sa në të njëjtën periudhë të para katër viteve”
Kreu i KLSH-së denoncoi drejtpëdrejt mungesën e ndëshkimit të zyrtarëve të lartë edhe pse KLSH ka konstatuar se ata kanë kryer vepërën penale të abuzimit me fondet publike.
“Shumë zyrtarë mbahen në administratë edhe pse kanë bërë shkelje”, tha Bujar Leskaj. Ai theksoi edhe për vështirësitë e këtij institucioni sa I përket presionit që vjen nga politika. “Por, edhe pse jemi anatemuar nga segmente politike, ne i qëndrojmë konstatimeve tona në sektorin energjitik”, ka vijuar më tej Leskaj.
I pranishëm në këtë analizë, kryeprokurori Adriatik Llalla ka vlerësuar rëndësinë e partneritetit mes KLSH-së dhe organit të akuzës. “KLSH është partneri ynë kryesor në luftën kundër krimit financiar. Në bazë të kallëzimit të KLSH u bë dhe arrestimi i ish-ministrit të Punës”, ka thënë Llalla.
