Diskutime edhe për hyrjet ilegale të zyrtarëve serbë në Kosovë
Një takim tjetër urgjent në mes Kosovës dhe Serbisë do të zhvillohet sot në Bruksel. Mësohet se temë diskutimi do të jetë njohja reciproke të certifikatave për transportin e mallrave të rrezikshme të njohura si ADR, shkeljet e marrëveshjes për vizitat zyrtare nga ana e zyrtarëve të Serbisë duke hyrë edhe ilegalisht në Kosovë, si dhe për ndalimin e vazhdimit të lëshimit të letërnjoftimeve nga strukturat paralele të Qeverisë së Serbisë, për qytetarët e Kosovës.
Ky takim urgjent vjen pas kërkesës së ministres Edita Tahiri, e cila kishte argumentuar se urgjentisht duhet të zgjidhet çështja e certifikatave të ADR-së sepse po cënohet marrëveshja për tregtinë e lirë.
Tahiri po ashtu kishte reaguar në BE-në për fushatën elektorale provokative të zyrtarëve të Serbisë gjatë qëndrimit të tyre në Kosovë duke kërkuar që BE-ja të marrë masa në zbatim të marrëveshjes për normalizimin e marrëdhënieve mes dy vendeve.
