Këshilltari për Siguri Kombëtare i Shteteve të Bashkuara të Amerikës, Jake Sullivan foli rreth situatës në Ukrainë. Në një intervistë për CNN, Sullivan u shpreh se bota është në një kohë kur pushtimi mund të fillojë në çdo moment dhe paralajmëroi për viktima të mundshme civile nëse shpërthen lufta. Ai tregoi edhe se si mund të nis sulmi rus.
Ai gjithashtu tha se megjithëse akumulimi i 130,000 trupave ruse është përshpejtuar në 10 ditët e fundit, vendi ende ka mundësi ta zgjidhë situatën përmes diplomacisë. Duke komentuar raportimet se Rusia mund ta sulmojë Ukrainën që të mërkurën, Sullivan tha:
“Ne nuk mund ta parashikojmë ditën në mënyrë perfekte, por kemi thënë prej disa kohësh se jemi në një periudhë kur pushtimi mund të fillojë në çdo moment, aksioni i madh ushtarak i Rusisë në Ukrainë mund të fillojë çdo ditë.”
I pyetur pse u kërkohet qytetarëve amerikanë të largohen nga vendi, Sullivan tha se në 10 ditët e fundit në 10 ditët e fundit ka qenë intensive.
“Ajo që kemi parë vetëm në 10 ditët e fundit është përshpejtimi i këtij akumulimi dhe lëvizja e forcave ruse të të gjitha llojeve më pranë kufirit me Ukrainën në një pozicion ku ata mund të nisnin veprime ushtarake shumë, shumë shpejt.”
Sullivan tha se ka të ngjarë që të ketë viktima civile.
“Nëse do të ketë një pushtim ushtarak rus të Ukrainës, ai ndoshta do të fillojë me një breshëri të konsiderueshme raketash dhe bombardimesh. Ato nuk janë kurrë aq të sakta sa çdo ushtri do të donte që të ishin kështu që civilët e pafajshëm mund të vriteshin pavarësisht nga kombësia e tyre. Kjo do të pasohej nga një sulm i forcave tokësore që lëvizin përtej kufirit ukrainas, përsëri ku civilët e pafajshëm mund të kapen në zjarr të kryqëzuar ose të bllokohen në vende nga të cilat nuk mund të largohen.”
Sullivan përsëriti mesazhin e SHBA-së se pasojat e pushtimit për Rusinë do të ishin të shpejta dhe serioze, duke shtuar se SHBA-ja po përgatitet për to.
“Ne jemi gati të përgjigjemi menjëherë dhe me vendosmëri, me ndihmën e aleatëve dhe partnerëve tanë. Nëse Rusia ecën përpara, ne do ta mbrojmë territorin e NATO-s, do t’i imponojmë Rusisë kosto dhe do të sigurojmë që të dalim nga kjo si një Perëndim më i fortë, më i vendosur” – tha ai.
