Deputeti socialist i kthehet ashpër kritikave ndaj Ramës: PS po trajtohet si biznes privat por jo e gjitha mund ti nënshtrohet kësaj tendence
Deputeti socialist Ben Blushi është rikthyer me kritika të forta ndaj kryetarit Rama. Pas mbledhjes së grupit parlamentar të PS-së, Blushi tha se PS duhet të hyjë në proces zgjedhor, atë proces që sipas tij nuk e ka bërë në këto 7 vite. Deputeti socialist tha se degë të caktuara të PS po jepen me koncesion duke theksuar se në mbledhjen e grupit parlamentar të PS-së kishte deputet që kanë shfaqur kritika për qeverinë duke kërkuar analizë të qeverisë në grup parlamentar.
“Një parti e cila nuk bën zgjedhje në përgjithësi ka një raport të vështirë me veten dhe ata që e kanë zgjedhur. Shkoni pyesni njerëz në të gjithë Shqipërinë. Nuk besoj se e miratojnë faktin që nuk ka zgjedhje në parti. Ka zona në Shqipëri ku deputetë fatkeqësisht të PS-së shkojnë dhe emërojnë njerëz pa zgjedhje, caktojnë njerëz sikur të kenë biznes privat se kush do të jetë delegat, kush do marrë pjesë në Kongres, kush është anëtar partie dhe kush jo. Ky nuk është biznes privat nuk ka ardhur koha që PS-në ta japim me koncesion. Jemi shumë herët dhe nuk ka arsye. Në zona të caktuara PS po jepet me koncesion, po trajtohet si biznes privat. Por jo e gjithë PS mund të jetë biznes privat. Në një biznes privat ndoshta nuk ka arsye të ketë zgjedhje, sepse njerëzit hiqen nga puna, në një parti jo”, tha Blushi.
