Nga Klodian Tomorri
Qeveria është çmendur. Ditë për ditë i heq nga nje tullë sistemit fiskal.
Një ditë heq taksat e hoteleve për të nxitur turizmin. Nuk kalon një javë nxjerr pykëz tjetër. “Do heqë taksat e agroturizmit për të nxitur ekonominë rurale”- thotë.
Gjithmonë mund të gjesh një argument për të hequr taksat. Edhe për bordellot madje, ka argument. Sepse, lufton stresin e popullatës.
Me logjikën që përdor qeveria i bie të bëjmë një ligj, të legalizojmë shitjen e seksit dhe ta përjashtojmë nga taksat, që të çlirojmë popullsinë nga hormonet. Çmenduri komplet.
Por, përjashtimet fiskale janë politikë e ndyrë në të gjitha drejtimet. Ato janë të padrejta, korruptive dhe asnjë herë nuk kanë efekt pozitiv në ekonomi. E vetmja gjë që bëjnë është se favorizojnë një grusht njerëzish në kurriz të gjithë të tjerëve dhe minojnë sistemin tatimor.
Ne, sot humbasim mbi 1.5 për qind e Prodhimit Kombëtar nga përjashtimet tatimore. Gati 20 miliardë lekë taksa në vit i falim. Me këto ritme shumë shpejt do i çojnë 3 për qind e PBB-së.
Pastaj, del kryeministri dhe pa ju dridhur buza thotë s’kam lekë të blej ilaçet për të sëmurët me tumor. Normal që s’do kesh.
