Nga 91 mijë biznese me status pasiv, një e treta në Tiranë
Në Tiranë janë rreth 36 mijë biznese, të cilat rezultojnë me status pasiv, që do të thotë se ka të paktën një vit që nuk ushtrojnë aktivitet. Sipas listës së publikuar nga tatimet nga 91 mijë biznese që janë klasifikuar në statusin pasiv në shkallë vendi, më shumë se një e treta e tyre ose 35 767 biznese ushtrojnë aktivitet në Tiranë. Sipas ligjit të procedurës tatimore, tatimet kalojnë regjistrimin e tatimpaguesit nga regjistri aktiv në regjistrin pasiv, në rast se biznesi nuk ushtron veprimtari tregtare për një periudhë tatimore prej 12 muajsh të njëpasnjëshëm. Po ashtu edhe biznesi që deklaron në QKR pezullim veprimtarie tregtare, përfshihet nga tatimet në statusin pasiv. Tatimet brenda 10 ditëve kalendarike nga data e transferimit të regjistrimit në regjistrin pasiv, njofton tatimpaguesin me shkrim.
Transferimi i regjistrimit tatimor nga regjistri aktiv në regjistrin pasiv nuk eliminon detyrimin tatimor ekzistues dhe nuk i ndalon tatimet për vlerësimin ose mbledhjen e detyrimit tatimor, pas transferimit në regjistrin pasiv. Administrata tatimore, automatikisht, transferon regjistrimin nga regjistri pasiv në regjistrin aktiv, kur tatimpaguesi rifillon veprimtarinë, dorëzon të gjitha deklaratat tatimore dhe kryen të gjitha pagesat e kërkuara. Çdo transaksion i kryer nga tatimpaguesit, persona fizikë apo juridikë, tregtarë, që janë në regjistrin pasiv, konsiderohet shkelje administrative dhe dënohet në përputhje me këtë ligj.
