Nga Laert Mezani
Më ka pëlqyer gjithnjë vendimi i Dashit, më e pakta ishte koherent, si puna e atyre enveristëve që edhe në shtrat të vdekjes nuk pranojnë dëmet e diktatorit. Ashtu dhe Dashi, megjithëse çam, megjithëse na u tha patriot e mbështetës i Çështjes Çame, ishte me Partinë Demokratike dhe i qëndroi besnik përherë Partisë Demokratike.
Personalisht nuk kam atributet për ta gjykuar, përgjithësisht me gjykime të kësisoj forme merret koha, historia. Më vjen keq (po për keqardhje i kam atributet) që bëri këtë zgjedhje, pasi duhet të ishte në radhë të parë, që pavarësisht humbjes së mandatit t’u bënte thirrje gjithë çamëve dhe mbështetësve të çështjes t’i bashkohen të vetmes parti që këtë të fundit e ka si gur themeltar në programin e vet, në arsyen e saj ekzistenciale. Por, gjithsesi besnikëria është për t’u vlerësuar.
Kur e sheh aty nëpër çadër, si qingji i Naimit, të paktën shpreson që dhe atje në dhe të huaj do t’u lodhë veshët për Çështjen Çame e mbase kushedi arrin dhe të ndihmojë disi. Pastaj, kur po në të njëjtën çadër sheh dhe Dule grekun, antishqiptar par excellence, antiçamin par excellence, nis e shpreson që tani, ndoshta të mbrojtur nën të njëjtën çadër do “llafosen” më së miri dhe ky i yni do ta mund anglishtfolësin dhe do ta bindë që Çështja Çame ekziston, që ka një parti qe po e çon përpara, e cila tashmë ka mbështetës në gjithë Shqipërinë, madje dhe në Dibër, ku e njihkan mirë vlerën e atdhetarisë. Pale sikur t’i shpjegonte anglishtfolësit ç’domethënë të punosh për kombin.
Për t’i bërë një resumè vetes Dashamir Tahiri, ish-deputet i PDIU, anëtar i Partisë Demokratike, do të kandidojë me PR-në, pasi është aleate e PD me po aq gjasa sa PBDNJ. Cili është ndryshimi mes kandidimit me një aleat apo me një tjetër? Vlen aq sikur të kandidoje edhe me PBDNJ. Më pas zgjohesh kujton që nuk je më i vogël, që çdo ditë e më shumë njerëzit të japin dëshminë se “Besnik” po mbetet emër njeriu, për më tepër démodé dhe jo vlerë.
