Pas Fondit Monetar Ndërkombëtar edhe BERZH ka ulur pritshmëritë për rritjen e ekonomisë shqiptare. Ditën e sotme Banka Europiane për Rindërtim dhe Zhvillim ka publikuar raportin në të cilët thuhet se deri në fund të 2022 ekonomia shqiptare mund të rritet vetëm me 3%. Kujtojmë se një muaj më parë BERZH bëri një zhvlerësim të rritjes në raport me parametrat që kishte parashikuar në fund të vitit 2021.
Banka, në raportin e fundit “Rikthimi i çmimeve të larta: Përballja me ushqimin dhe energjinë e shtrenjtë”, publikuar sot, pret që ekonomia shqiptare të rritet me 3%, me një ulje prej 0.3 pikë nga vlerësimi i fundit i marsit.
Në mars BERZH priste që ekonomia e Shqipërisë të zgjerohej me 3.3% në vitin 2022, duke u ulur me 0.4 pikë përqindje, në krahasim me projeksionin e muajit nëntor. Në total, tashmë BERZH pret që rritja ekonomike e vendit të jetë 0.7 pikë përqindje më e ulët sesa në Nëntor, kur parashikohej një rimëkëmbje e shpejtë pas pandemisë. Në pjesën për Shqipërinë, BERZH thekson se niveli i të ardhurave ka rënë, varfëria ka pësuar rritje dhe kjo do të ndikojë në indikatorin bazë të ekonomisë, reduktimin e konsumit.
“Ekonomia pritet të arrijë një rritje më të ngadaltë në vitin 2022 pas një rikuperimi të fortë në 2021, kur PBB-ja u rrit me rreth 8.5 për qind, si pasojë e rritjes së turizmit dhe rimëkëmbjes së kërkesës së brendshme. Rritja e fuqishme e investimeve u mbështet nga rindërtimi publik i lidhur me tërmetet. Por, mungesa e investimeve dhe lufta kanë bërë që të ardhurat dhe punësimi të ngecin, pa shënuar asnjë përparim. Si pasojë konsumi do të reduktohet në përqindje të lartë”, thuhet në raport. Sipas BERZH, qeveria duhettë mbështesë ato kategori që preken nga rritja e çmimeve në të kundërt gjendja do të përkeqësohet.
